Мамлекеттик автомектептерге кабыл алуу 10-февралда башталат
Кыргызстанда 10-февралдан тартып мамлекеттик автомектептерге онлайн каттоо жана жаңы программалардын киргизилиши башталат Мамлекеттик транспорттук каражаттарды каттоо борборунун басма сөз кызматы кабарлады.
Анын маалыматы боюнча, арыздар алгачкы каттоо үчүн гана онлайн форматта расмий avtomektep.srs.kg сайты аркылуу кабыл алынат. Арыз берүү үчүн жеке маалыматтарды толтуруу, окутуу аймагын тандап, айдоочулук күбөлүктүн категориясын көрсөтүү талап кылынат. Андан соң электрондук арыз платформанын аркылуу жөнөтүлөт.
Онлайн арыз тапшыргандан кийин маалыматтар каралып, талапкерлер тандаган аймактагы мамлекеттик автомектепке кабыл алынат.
Курсанттар үчүн теориялык сабактар онлайн форматта өтөт. Ошондой эле бир нече окуу агымдары түзүлгөн, бул көп арыздарды камтуу жана автомектептердин ашыкча жүктөлүшүн болтурбоо үчүн жасалган.
Мындан тышкары, күн сайын жаңы мамлекеттик автомектептер кошулуп жатат. Реформа алкагында айдоочуларды даярдоонун жаңы программалары иштелип чыкты. Алар окутуунун сапатын жогорулатууга, коопсуз айдоо маданиятын калыптандырууга жана жол кырсыктарынын санын азайтууга багытталган.
Программалар жол эрежелерин терең үйрөнүүнү, практикалык даярдыкты күчөтүүнү, заманбап тренажерлерди колдонуу жана транспорттук каражаттарды техникалык тейлөө негиздерин өздөштүрүүнү камтыйт.
Мындан тышкары, президент Садыр Жапаровдун тапшырмасы боюнча автомектептеги окуу мөөнөтүн кайра карап чыгуу мүмкүнчүлүгү каралып жатат. Мамлекет башчынын иштерин башкарган Каныбек Туманбаевдин айтымында, тесттик режимде жогорку көрсөткүчтөрдү көрсөткөн курсанттар төрт айлык окуудан кийин тесттен өтүү мүмкүнчүлүгүнө ээ болушу мүмкүн.
Тесттен жана экзаменден ийгиликтүү өткөн курсанттар бир жылдык убактылуу айдоочулук күбөлүк алышат. Бул убакыт ичинде жол эрежелерин бузбаса, аларга туруктуу айдоочулук күбөлүк берилет.
