А.Бакаев көчөсү Москва көчөсүнө чейин уланат
Бишкек шаарында Бакаев көчөсү Москва көчөсүнө чейин узартылып, Бейшеналиева көчөсүнө чыгарын вице-мэр Рамиз Алиев билдирди.
Анын айтымында, буга чейин мэрия Бакаев көчөсүн темир жол өтмөгүнүн алдынан Бөкөнбаев көчөсүнө чейин ачкан. Кийинки этапта жолду дарыянын боюн бойлой Москва көчөсүнө чейин улантуу жана Бейшеналиева менен Москва көчөлөрүнө чыга турган көпүрө куруу пландалууда.
"Бул — иштердин экинчи этабы. Аны ишке ашырууга жакынкы убакта киришүү пландалып жатат", — деди вице-мэр.
Бакаев көчөсүнүн Лев Толстой көчөсүнөн Бөкөнбаев көчөсүнө чейинки тилкеси тууралуу сөз кылган Рамиз Алиев калган иштердин көлөмү болжол менен бир жумага жетерин белгиледи. Күн жылый баштаганда иштер жанданып, андан соң бул участок кыймыл үчүн ачылат.
Вице-мэрдин айтымында, көчөнү узартуу логикалуу транспорттук схеманы түзүү үчүн зарыл. Келечекте бир тараптуу кыймылды уюштуруу мүмкүнчүлүгү да каралууда: Бакаев көчөсү боюнча — түштүк багытта, ал эми Асаналиев көчөсү боюнча — түндүк багытта.
Ошондой эле ал Лев Толстой жана Жаш Гвардия көчөлөрүнүн кесилишинде транспорттук жол айрыгын куруу пландалып жатканын билдирди.
