Төө-Ашууда оор жүк ташуучу унааларга убактылуу чектөө киргизилди
Аба ырайынын кескин өзгөрүшүнөн улам көпчүлүк аймактарда кар жаап, жол тазалоо иштерин “Кыргызавтожол-Түштүк” жана “Кыргызавтожол-Түндүк” мамлекеттик ишканалары күнү-түнү жүргүзүп жатышат. Бул тууралуу Транспорт жана коммуникациялар министрлигинин маалымат кызматынан билдиришти.
Бүгүн, 11-февралга карата саат 08:30га Бишкек-Ош жолундагы Төө-Ашуу аймагында (03:40 тартып) оор жүк ташуучу унааларга убактылуу чектөө киргизилди. Ал эми Суусамыр-Талас-Тараз жолундагы Өтмөк ашуусунда кар жаап жатат, жол ачык жана каттамдар жүрүүдө.
Министрлик кандай кырдаал жаралбасын каршы тилкеге чыкпоого, жол эрежелерин так сактоого жана унаанын дөңгөлөктөрүн кышкыга алмаштырып алууга чакырат.
