Токтогул – Беш-Таш унаа жолунун 53 чакырымына асфальт төшөлөт
25-мартта Транспорт жана коммуникациялар министри Талантбек Солтобаев иш сапары менен Токтогул районуна барып, Токтогул – Беш-Таш унаа жолунда жүргүзүлүп жаткан иштер менен жеринде таанышты. Бул тууралуу ведомстводон билдиришти.
Учурда жалпы узундугу 53 чакырымды түзгөн жол тилкесинде жер иштери башталган.
Буга чейин жолдун айрым бөлүктөрү гана асфальтталып, калган тилкелеринде жарандарга жана транспорт каражаттарына бир топ кыйынчылыктар жаралып келген.
Иш сапардын жүрүшүндө министр жол тармагында иштеген кызматкерлер менен жолугуп, аткарылып жаткан иштерди текшерди. Ошондой эле курулуштун сапатын камсыз кылуу жана иштерди белгиленген мөөнөттө бүткөрүү боюнча тиешелүү тапшырмаларды берди.
Белгиленгендей, аталган жолдун асфальтталышы бир нече айылдын жашоочулары үчүн шарттарды жеңилдетип, транспорттук байланышты жакшыртат жана аймактын социалдык-экономикалык өнүгүүсүнө өбөлгө түзөт.
