Курулган жолдордун сапаты текшерилди
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, социалдык объектилерди жана жолдорду куруунун сапатына көзөмөлдү күчөтүү максатында Мамлекеттик архитектура-курулуш контролдоо департаменти жана курулушта сертификаттоонун республикалык борбору тарабынан атайын рейддик иш-чаралар жүргүзүлүүдө. Бул тууралуу аталган министрликтен кабарлашты.
Маалыматка траянсак, рейддин алкагында Ош шаарында 2024–2025-жылдары капиталдык оңдоодон өткөрүлгөн жолдордун, ирригациялык тутумдардын жана лотоктордун сапаты текшерилди. Текшерүүнүн жүрүшүндө асфальттын астыңкы катмарын талаптагыдай тыгыздоо иштери жүргүзүлбөгөндүгү аныкталып, анын кесепетинен жаан-чачындан кийин жолдордун чөгүшү жана асфальт катмарында жаракалардын пайда болушу катталды.
Атап айтканда, Демократ көчөсү, Энесай конушу, А. Навои көчөсү, Ош базарынын ички жолдору, Сатиев көчөсү (капиталдык оңдоо), Т. Касымбеков көчөсү (реконструкция), ошондой эле учурда курулуш иштери жүрүп жаткан Көкүм бий көчөсү, Р.Юнусов жана Күрөңкеев көчөсү, Алай көчөсүнүн тротуары жана башка бир катар көчөлөр текшерүүгө алынды.
Аталган жолдордун жана тротуарлардын курулуш сапаты боюнча Ош шаарынын мамлекеттик архитектура-курулуш контролдоо башкармалыгы тарабынан подрядчы уюмдарга эскертүүлөр берилип, административдик айып пулдар салынды.
Мындан тышкары, талапка жооп бербеген жолдорду, тротуарларды жана лотокторду тез арада оңдоо же кайрадан асфальт төшөө боюнча Ош шаарынын мэриясынын "Ош шаардык жолдор башкармалыгы" муниципалдык ишканасына расмий кат жөнөтүлдү. Аталган каттын негизинде тиешелүү оңдоо иштери жүргүзүлөт.
