Ош – Тамчы аба каттамы кайра жанданат
“Асман Эйрлайнс” авиакомпаниясы 26-июндан тарта Ош – Тамчы – Ош багыты боюнча үзгүлтүксүз аба каттамдарын кайрадан жандантат. Бул тууралуу "Кыргызстан аэропорттору" ишканасынан билдиришти.
Маалыматка ылайык, каттамдар жумасына үч жолу - дүйшөмбү, шаршемби жана жума күндөрү аткарылат. Авиакомпаниянын жаңы каттамдары Ош, Жалал-Абад, Баткен аймактарынын тургундарына көл жээгине тез жана ыңгайлуу жетүүгө мүмкүнчүлүк түзөт. Тамчы аэропортуна жетүү болгону бир саатка созулат.
Бир тарапка билеттин баасы 6 500 сомду түзөт. Билеттерди авиакомпаниянын расмий сайты жана мобилдик тиркемеси аркылуу кошумча комиссиясыз сатып алууга болот.
