Бишкекте 1 күндө 720 миңдей жүргүнчү жол кирени накталай эмес төлөдү
Бишкек шаарынын мэри Айбек Жунушалиев муниципалдык коомдук транспорттун айдоочулары менен жолугушуп, жол кирени накталай эмес төлөө системасына толук өтүү боюнча аткарылып жаткан иштерди талкуулады.
Мэрдин айтымында, жаңы төлөм системасы коомдук транспорттун тейлөө сапатын жакшыртып, түшкөн каражаттардын ачык-айкындуулугун камсыз кылууга жана жүргүнчүлөр үчүн ыңгайлуу шарттарды түзүүгө багытталган.
"Ушул жылдын апрель айынан тартып айдоочулардын эмгек акысы 33%га жогорулатылды. Эми негизги максат — жаңы окуу жылы башталганга чейин накталай эмес төлөм системасын толук ишке киргизүү. Кечээ эле 720 миңден ашуун жүргүнчү жол киресин накталай эмес ыкма менен төлөдү", — деди Айбек Жунушалиев.
Ошондой эле ал бардык түшкөн каражаттар коомдук транспортту жаңылоого, айдоочулардын эмгек акысын жогорулатууга, транспорттук инфраструктураны өнүктүрүүгө жана тармактагы башка маселелерди чечүүгө багытталарын белгиледи.
Мэр айдоочуларды жүргүнчүлөргө жаңы төлөм тартибин сылык түшүндүрүүгө, жол кыймылынын эрежелерин так сактоого жана коопсуздукка өзгөчө көңүл бурууга чакырды.
Жүргүнчүлөргө маалымат берүү максатында мэриянын кызматкерлери да коомдук транспорт каттамдарында түшүндүрүү иштерин жүргүзүп жатышат. Алар шаар тургундарына жол кирени төлөөнүн жаңы тартиби боюнча кеңеш берип, электрондук төлөм ыкмаларын колдонууга жардам көрсөтүшөт.
Эске салсак, 1-июлдан тартып жүргүнчүлөр жол киресин "Тулпар" транспорттук картасы, Visa, Mastercard, "Элкарт" банктык карталары, QR-коддор жана башка электрондук төлөм кызматтары аркылуу төлөй алышат. Бир жолку электрондук билетти пайдаланган жүргүнчүлөр үчүн QR-код аркылуу төлөө мүмкүнчүлүгү да каралган.
