Түндүк айланма жолундагы эстакадалык көпүрөнүн үстүңкү бөлүгү ачылды
Курманжан Датка көчөсү менен Түндүк айланма жолунун кесилишинде курулган жаңы эстакадалык көпүрө унаа агымынын үзгүлтүксүз жана тыгынсыз жүрүшүн камсыздоо максатында үстүңкү бөлүгү асфальтталып, унаалар үчүн эки тараптуу кыймыл берилди. Бул тууралуу Транспорт жана коммуникациялар министрлигинен билдиришти.
Маалыматка ылайык, жаңы жол түйүнү Бишкектен Ысык-Көл жана Нарын облустарына каттамды кыйла жеңилдетүүгө жана жол жүрүү убактысын кыскартууга өбөлгө түзөт.
Көпүрөнүн ар бир багытында үчтөн кыймыл тилкеси каралган. Жакынкы убакта жарыктандыруу системасын, жол белгилерин жана жол чийиндерин орнотуу боюнча иштер жүргүзүлөт.
Белгилей кетсек, жол түйүнүнүн курамындагы калган эстакадалык көпүрөлөрдө жана башка курулуш тилкелеринде иштер белгиленген графикке ылайык тынымсыз уланууда.
Министрлик курулуш иштери толук аяктаганга чейин жолдогу убактылуу ыңгайсыздыктарга түшүнүү менен мамиле жасап, жол кыймылынын эрежелерин так сактоону өтүнөт
