Балыкчы – Бөкөнбаев – Каракол жолу текшерилди
Транспорт жана коммуникациялар министри Талантбек Солтобаев Балыкчы – Бөкөнбаев –Каракол автомобиль жолун оңдоп-түзөө иштеринин жүрүшү менен жеринен таанышып, курулуш иштеринин сапатын жана аткарылып жаткан жумуштардын графигин текшерди. Бул тууралуу Транспорт жана коммуникациялар министрлигинен билдиришти.
Маалыматка ылайык, иш сапарынын жүрүшүндө министр жооптуу жетекчилер жана подрядчы компаниялардын өкүлдөрү менен жолугуп, долбоорду белгиленген мөөнөттөн кечиктирбестен бүтүрүү, курулуш иштеринин сапатын жогорку деңгээлде камсыз кылуу жана бардык техникалык талаптарды так сактоо боюнча тапшырмаларды берди.
Министр белгилегендей, долбоор Президент Садыр Жапаровдун колдоосу жана мамлекеттик бюджеттен бөлүнгөн каражаттын эсебинен ишке ашырылууда.
Балыкчы – Бөкөнбаев – Каракол автомобиль жолунун жалпы узундугу 141 чакырымды түзөт. Долбоор толук аяктагандан кийин II категориядагы төрт тилкелүү, ортосу барьердик тосмо менен бөлүнгөн заманбап автомобиль жолу пайдаланууга берилет. Бул жолдун өткөрүү мүмкүнчүлүгүн жогорулатып, жол кыймылынын коопсуздугун камсыз кылуу менен катар Ысык-Көл облусунун транспорттук инфраструктурасын өнүктүрүүгө жана ички туризмди колдоого олуттуу салым кошот.
Ошондой эле министр жооптуу жетекчилерге курулуш иштерине туруктуу көзөмөл жүргүзүү, подрядчы уюмдар тарабынан бардык жумуштардын белгиленген мөөнөттө жана талаптагыдай сапатта аткарылышын камсыз кылуу боюнча милдеттерди койду.
Транспорт жана коммуникациялар министрлиги жол куруу иштеринин жүрүшүн көзөмөлдөөнү улантып, стратегиялык маанидеги инфраструктуралык долбоорлордун өз убагында жана сапаттуу ишке ашырылышын камсыз кылуу боюнча иштерди улантат.
