Кыргызстанда жети айда 1100 чакырым жолго асфальт төшөлдү
Кыргызстанда жол куруу иштери быйыл кыйла ылдамдап, үстүбүздөгү жылдын 1-августуна карата 1100 чакырым унаа жолуна асфальт төшөлдү. Бул тууралуу Транспорт жана коммуникациялар министрлиги билдирди.
Маалыматка ылайык, өткөн жылдын ушул мезгилинде өлкө боюнча 455 чакырым жол гана асфальтталган. Натыйжада быйылкы көрсөткүч былтыркыга салыштырмалуу 645 чакырымга көп болуп, жол куруу иштеринин көлөмү дээрлик 2,5 эсеге өстү.
Министрлик белгилегендей, мындай өсүш өлкөдө жол инфраструктурасын жаңылоо иштери ырааттуу жүргүзүлүп жатканын көрсөтөт. Бул транспорттук байланыштын сапатын жакшыртып, аймактардын жеткиликтүүлүгүн жогорулатууга жана жарандар үчүн коопсуз, ыңгайлуу жол шарттарын түзүүгө багытталган.
Учурда республика боюнча республикалык жана ички маанидеги автожолдордо курулуш, реконструкциялоо жана капиталдык оңдоо иштери белгиленген графикке ылайык уланууда.
