Адылбек Касымалиев: Ысык-Көлдөгү айланма жолдун курулушу эки-үч жылдын ичинде аяктайт
Министрлер Кабинетинин төрагасы Адылбек Касымалиев жакынкы жылдары Ысык-Көл облусунда жолдорду масштабдуу оңдоо пландалып жатканын билдирди.
“Өзүңүздөр көрүп тургандай, Балбай айылына чейинки жолду оңдоо иштери дээрлик аяктады. Андан ары Балбайдан Караколго, андан кийин Барскоонго жана Балыкчыга чейинки тилкени оңдоо иштери уланат. Ысык-Көлдөгү айланма жолду оңдоо иштери эки-үч жылдын ичинде аякталат деп пландалууда. Мындан тышкары, Чолпон-Атага чейин темир жол куруу пландарыбыз бар”, – деди Касымалиев.
Касымалиевдин айтымында, ири эл аралык иш-чараларды өткөрүү учурунда тыгындарды болтурбоо мүмкүн эмес. Ошондуктан бийлик аймактын жол инфраструктурасын жаңылоону көздөп жатат.
