Жол курууда мамлекетке 171 млн сомдон ашык зыян келтирилген

Башкы прокуратура тарабынан жол курууга бөлүнгөн бюджеттик каражаттардын пайдаланылышы боюнча жүргүзүлгөн текшерүүнүн жыйынтыгында ири өлчөмдөгү мыйзам бузуулар аныкталды.

Башкы прокуратуранын маалыматына ылайык, текшерүүдө №11 жана №4 жол эксплуатациялык ишканаларынын, ошондой эле "Кыргызавтожол-Түндүк" мамлекеттик ишканасынын жооптуу кызмат адамдары Ак-Суу районундагы Жыргалаң лыжа базасына баруучу жолду куруу жана Түп районундагы Каркыра – Турук – Сары-Жаз жолуна шагыл төшөө иштерине субподрядчы катары квалификациялык талаптарга жооп бербеген, окшош иштерди аткаруу тажрыйбасы жок жана жетиштүү финансылык, материалдык-техникалык мүмкүнчүлүктөргө ээ болбогон "Д.Т." ЖЧКсын тартканы аныкталган.

Ошондой эле жооптуу кызмат адамдары мыйзам талаптарын бузуу менен келишимдердин аткарылышын камсыз кылуучу кепилдиктер жана аткарылган иштердин иш жүзүндөгү көлөмүн тастыктаган документтер жок болсо да, аталган компаниянын эсебине бюджеттик каражаттарды которушканы белгилүү болгон.

Башкы прокуратуранын маалыматына ылайык, "Д.Т." ЖЧКсы алынган каражаттарды жол куруу иштерине жумшабай, башка максаттарга пайдаланган. Мунун кесепетинен мамлекетке 171 миллион сомдон ашык зыян келтирилген.

Аталган фактылар боюнча Кыргыз Республикасынын Кылмыш-жаза кодексинин 337-беренеси ("Кызмат абалынан кыянаттык менен пайдалануу") жана 210-беренеси ("Ишенип берилген мүлктү ыйгарып алуу же коротуп жиберүү") боюнча эки кылмыш иши козголду. Учурда бул иштер боюнча тергөө амалдары жүргүзүлүүдө.