Барскоон – Бедел жолу 2030-жылы пайдаланууга берилет
Узундугу 161 чакырым болгон Барскоон – Бедел унаа жолу эки тилкелүү болуп курулуп, 2030-жылы пайдаланууга берилери пландалууда. Бул тууралуу China Road and Bridge Corporation компаниясынан билдирди.
Маалыматка ылайык, жол деңиз деңгээлинен 3000 метрден ашык бийиктиктеги татаал тоолуу аймак аркылуу өтөт. Долбоордун алкагында 50дөн ашык көпүрө, анын ичинде үч ири көпүрө, эки туннель жана бир жол түйүнү курулат.
Эң ири курулуш объектиси Барскоон дарыясы аркылуу өтүүчү көпүрө болот. Анын узундугу 360 метр, бийиктиги 80 метрди түзүп, пайдаланууга берилгенден кийин Кыргызстандагы эң чоң көпүрөгө айланат.
Ошондой эле Тарагай дарыясында 287 метрлик, Кара-Сай дарыясында 417 метрлик көпүрөлөр курулат. Мындан тышкары, Сөөк ашуусунда узундугу 5340 метр болгон “Сөөк” жана 3788 метрлик “Ашуу-Суу” туннелдери салынып, заманбап жарыктандыруу системалары менен жабдылат.
Компаниянын маалыматына ылайык, курулуш иштери бүткөндөн кийин объектке 5 жылдык кепилдик мөөнөтү берилет.
