Кыргызстан менен Кытай транспорт тармагындагы жаңы долбоорлорду талкуулады
Транспорт жана коммуникациялар министри Талантбек Солтобаев Кыргызстандагы Кытай Эл Республикасынын Атайын жана Ыйгарым укуктуу Элчиси Лю Цзянпин менен жолугушуп, эки өлкөнүн транспорт тармагындагы кызматташтыгынын учурдагы абалын жана аны мындан ары өнүктүрүү маселелерин талкуулады.
Министр акыркы жылдары Кыргызстан менен Кытайдын ортосундагы товар жүгүртүү көлөмү өсүп жатканын белгилеп, бул транспорттук инфраструктураны өнүктүрүүнүн маанилүүлүгүн арттырып жатканын билдирди.
Жолугушууда "Кытай – Кыргызстан – Өзбекстан" темир жолунун курулушу, ошондой эле "Бедел" өткөрмө пункту аркылуу өтүүчү "Барскоон – Үчтурпан – Аксу" жаңы автомобиль жолун куруу долбоорлорунун стратегиялык маанисине өзгөчө көңүл бурулду.
Мындан тышкары, тараптар эл аралык автомобиль ташуулары боюнча өкмөттөр аралык макулдашуунун долбоорун жана кыргыз-кытай мамлекеттик чек арасындагы Үзөңгү-Кууш (Чоң-Узун-Гуш) чек ара дарыясы аркылуу "Бедел" өткөрмө пунктунда автомобиль көпүрөсүн куруу боюнча макулдашууну даярдоо маселелерин карашты.
Ошондой эле жолугушууда күйүүчү-майлоочу материалдарды ташууга байланыштуу логистикалык маселелер да талкууланды.
Жолугушуунун жыйынтыгында Кыргызстан менен Кытай транспорт жана логистика тармагындагы кызматташтыкты мындан ары кеңейтүүгө жана бардык актуалдуу маселелер боюнча тыгыз кызматташууну улантууга даяр экенин билдиришти.
