"Каракол" аэропорту биринчи жолу Airbus A320 учагын кабыл алды
Бүгүн "Каракол" эл аралык аэропортунда учуп-конуу тилкесин масштабдуу реконструкциялоо иштери аяктагандан кийинки алгачкы техникалык каттам аткарылды. Аэропорттун тарыхында биринчи жолу магистралдык класстагы Airbus A320 аба кемеси кабыл алынды. Бул тууралуу "Кыргызстан аэропорттору" ААКнын басма сөз кызматынан билдиришти.
Техникалык каттам жаңыланган аэродром инфраструктурасынын ири учактарды кабыл алууга даяр экенин көрсөттү. Бул аэропортто туруктуу эл аралык каттамдарды ишке киргизүүгө даярдыктын маанилүү этаптарынын бири болуп саналат.
Реконструкциянын алкагында аэропорттун учуп-конуу тилкеси 2 450 метрден 3 750 метрге чейин узартылды. Мындан тышкары, заманбап жарык-белги берүү жабдуулары жана ILS инструменталдык кондуруу системасы орнотулду. Бул өзгөртүүлөр аэропорттун мүмкүнчүлүктөрүн кеңейтип, учуу коопсуздугун жогорулатууга шарт түзөт.
Буга чейин "Каракол" аэропорту негизинен Dash 8 Q400 сыяктуу аймактык учактарды жана бизнес-жеттерди кабыл алып келген. Реконструкциядан кийин аэропорт Airbus A320 жана Boeing 737 сыяктуу ири учактарды тейлөөгө мүмкүнчүлүк алды.
"Кыргызстан аэропорттору" ААК башкармалыгынын төрагасы Манасбек Самидинов бул окуя Ысык-Көл облусунун авиация тарыхындагы жаңы этап экенин белгиледи.
Анын айтымында, учурда Россиядан, КМШ өлкөлөрүнөн, Жакынкы Чыгыш мамлекеттеринен жана башка багыттардан Караколго жаңы каттамдарды ачуу боюнча иштер жүргүзүлүүдө. Негизги максат — Караколду Ысык-Көлдүн толук кандуу аба дарбазасына айлантып, чет өлкөлүк туристтерге аймакка түз жетүүгө шарт түзүү.
Самидинов ошондой эле өлкөдөгү аэропорттук инфраструктураны модернизациялоо жана жарандык авиацияны өнүктүрүү боюнча иштер мамлекеттик деңгээлде улантылып жатканын белгиледи.
