Арашан – Чуңкурчак унаа жолунда асфальттын экинчи катмары төшөлүүдө
Чүй облусунда туристтик мааниге ээ Арашан – Чуңкурчак унаа жолунда курулуш иштери активдүү уланууда. Бул тууралуу "Кыргызавтожол-Түндүк" мамлекеттик ишканасынан билдиришти.
Маалыматка ылайык, жалпы узундугу 21,7 чакырымды түзгөн жолдун 16-20-чакырымдарында асфальттын экинчи катмарын төшөө иштери жүргүзүлүүдө.
Ошондой эле жол боюндагы тирөөч дубалдарды жана суу өткөрүүчү түтүкчөлөрдү орнотуу иштери толугу менен аяктаган. Мындан тышкары, эки көпүрөнүн курулушу бүттү.
Учурда жолдун кооптуу тилкелеринде кыймылдын коопсуздугун камсыз кылуу максатында жол белгилери жана темир тосмолор орнотулууда.
Белгиленгендей, Арашан – Чуңкурчак жолу — Чуңкурчактагы лыжа базаларына жана эс алуу жайларына алып баруучу негизги каттамдардын бири.
Жол курулушу толугу менен аяктагандан кийин туристтик аймактарга жетүү кыйла ыңгайлуу жана коопсуз болуп, жолдун сапаты жакшырары белгиленди.
