Фрунзе көчөсүнүн бир тилкесинде жол кыймылына чектөө киргизилди
Бүгүнтөн тарта Фрунзе көчөсүнүн Ибраимов көчөсүнөн Абдрахманов көчөсүнө чейинки бөлүгү убактылуу жабылат. Бул тууралуу калаа мэриясынан билдиришти.
Маалыматка ылайык, бул иштер жолду жаңылоонун кезектеги баскычы. Буга чейин Фрунзе көчөсүнүн А. Сүйүмбаев көчөсүнөн Ибраимов көчөсүнө чейинки тилкесинде оңдоо иштеринин негизги бөлүгү аяктап, жол кыймылы кайра жанданган.
Белгиленгендей, жолдун эски асфальт-бетон катмары алынат. Ошондой эле негизи бекемделип, инженердик тармактар оңдолот, жаңы асфальт төшөлүп, жол инфраструктурасы жаңыланат.
Жол тилкесинин жабылышы шаардагы унаа кыймылына мүмкүн болушунча аз таасир этүү максатында этап-этабы менен жүргүзүлүүдө.
Мэрия айдоочуларды жана жөө жүргүнчүлөрдү каттамдарын алдын ала пландап, убактылуу киргизилген жол кыймылынын өзгөрүүлөрүн эске алууга чакырды.
