Бишкектин бир катар конуштарында жолдор жаңыланууда
Бишкек шаарынын мэри Айбек Джунушалиев борбор калаадагы жол инфраструктурасы жана спорттук объектилер боюнча жүргүзүлүп жаткан курулуш иштерин текшерди. Бул тууралуу мэриядан билдиришти.
Мэр Анкара көчөсүнүн Ауэзов көчөсүнөн "Рухий-Мурас" конушундагы 8-көчөгө чейинки бөлүгүндө салынып жаткан тротуардын курулушу менен таанышты. Анын жалпы узундугу 1 чакырымды түзөт.
"Кара-Жыгач" конушундагы Шаты көчөсүндө 616 метр жол курулууда. Унаа жүрүүчү бөлүктүн туурасы 7 метрди түзүп, жолдун эки тарабына жалпы узундугу 924 метр тротуар куруу каралган.
Ал эми "Көк-Жар" конушундагы Күмүшалиева көчөсүндө узундугу 300 метрден ашкан жол курулуп жатат. Унаа жүрүүчү бөлүктүн туурасы 8 метрди түзөт.
Мындан тышкары, Айбек Джунушалиев Куланов жана Сухэ-Батор көчөлөрүнүн кесилишинде салынып жаткан заманбап футбол комплексинин курулушун текшерди. Комплекстин негизги стадиону 6 700 көрүүчүгө ылайыкталып, FIFAнын III категориясынын талаптарына жооп берет. Ошондой эле 9 машыгуу талаасы жана 500 унаага ылайыкталган токтотуучу жай каралган.
Мэр жооптуу кызматтарга иштердин сапатын жана темпин көзөмөлдөөнү күчөтүп, жолдорго чектеш аймактарды комплекстүү көрктөндүрүүгө көңүл бурууну тапшырды.
