КРУБ өкүлдөрү ЭВФ жана Дүйнөлүк банк тобунун жазгы жыйындарына катышышты
2026-жылдын 14-апрелинде Вашингтондо өткөн Эл аралык валюта фондунун (ЭВФ) жана Дүйнөлүк банк тобунун жазгы жыйындарынын алкагында КРнын Улуттук банкынын төрагасы Алмаз Бакетаев менен ЭВФтин Жакынкы Чыгыш жана Борбордук Азия өлкөлөрү боюнча департаментинин директору Жихад Азур жана ЭВФтин Кыргызстан боюнча миссиясынын башчысы Дмитрий Гершенсондун эки тараптуу жолугушуусу болуп өттү.
Жолугушууда тараптар КРдагы учурдагы экономикалык тенденциялар жана IV берене боюнча консультациялардын алкагында Фонддун жакында болгон миссиясынын жыйынтыгын талкууга алышты. Тараптар жогорку белгисиздик жана глобалдуу геосаясий чакырыктар шартында ишке ашырылып жаткан экономикалык саясаттын чараларына өзгөчө көңүл бурушту.
Сүйлөшүүлөрдүн жүрүшүндө Кыргыз Республикасынын ЭВФ менен мындан аркы кызматташуусунун келечеги, анын ичинде CCAMTAC - Кыргызстандын ЭВФтин Кавказ, Борбордук Азия жана Монголия аймагы үчүн потенциалды өнүктүрүү боюнча аймактык борборунун ишине катышуусун кеңейтүү маселелери да талкууланды.
Тараптар республиканын мамлекеттик органдарынын институционалдык потенциалын жогорулатууга багытталган программалардын алкагында техникалык өз ара иш алып барууну тереңдетүүнүн маанилүүлүгүн белгилешти.
Ушул эле жыйындардын алкагында, КРнын Улуттук банкынын төрагасы Швейцария Улуттук банкынын төрагасы Мартин Шлегель менен жолугушту.
Сүйлөшүүлөрдүн жүрүшүндө тараптар финансылык жөнгө салуучулардын көп жылдык өз ара иш алып баруусун жогору баалап, кызматташтыкты мындан ары да чыңдоого даяр экендигин билдиришти. Эксперттик билим алмашууга жана биргелешкен окутуу программаларын өнүктүрүүгө өзгөчө көңүл бурулду.
