Улуттук банк алтынчы ирет интервенция менен чыгып, 168 млн доллар сатты
КРнын Улуттук банкы 16-апрелде быйылкы жылдын эсеби менен валюта рыногунда алтынчы ирет интервенция жасап, 168 млн доллар сатты. Бул сумманын 111.4 млн доллары бүтүмгө келишилген күндөгү эсептөөлөр менен ишке ашырылса, 56.6 млн доллары бүтүмгө келишилген күндөн башка күндөгү эсептөөлөр менен сатылган.
Көлөмүнүн ирилиги боюнча жыл башынан берки интервенциялардын арасынан бул сатуу 30-мартта болгон интервенциядан кийинки экинчи орунда турат. Жыл башынан бери жүргүзүлгөн интервенцияларды эске алганда, жалпы валюта сатуунун көлөмү 893.45 млн долларга жетти. Натыйжада, Улуттук банк төрт айга жетпеген убакыт ичинде эле 2025-жылдагы жалпы интервенциялардын көлөмүнөн ашып түштү.
Эске салсак, 2025-жылы жөнгө салуучу сегиз жолу валюта интервенциясын жүргүзүп, жалпы 853 млн доллар саткан. Өткөн жылы эң ири бир жолку сатуу 22-декабрда болуп, анын көлөмү 179,5 млн долларды түзгөн.
