BAKAI жана ИИМдин Кылмыш иликтөө башкы башкармалыгы кибершылуундукка каршы: CYBERTOR-2026 эксперттерди жана миңдеген катышуучуларды бириктирди
2026-жылдын 23-апрелинде Бишкекте кибершылуундукка каршы күрөшүүгө жана жарандарды санарип чөйрөдө коргоого арналган форум өттү. Иш-чара мамлекеттик органдардын, бизнес өкүлдөрүнүн жана эл аралык эксперттердин башын бириктирди. Онлайн-трансляцияны 1000ден ашуун адам көрүп, форум Кыргызстандын бардык 7 облусунан катышуучуларды камтыды.
CYBERTOR-2026 заманбап киберкоркунучтарды талкуулоочу негизги аянтчага айланды. Форумга Россия Федерациясынан жана Беларусь Республикасынан келген коноктор катышып, бул иш-чаранын эл аралык деңгээлин жана маанисин дагы бир жолу белгиледи. Катышуучулар шылуундуктун актуалдуу схемаларын, жасалма интеллект жана deepfake сыяктуу технологиялардын таасирин, ошондой эле реалдуу учурларды жана коргонуу ыкмаларын талкуулашты.
Киберкылмыштуулукка каршы күрөштүн эл аралык тажрыйбасы тууралуу Россия ИИМинин Омск академиясынын башчысынын орун басары, юридика илимдеринин доктору, профессор, полициянын полковниги жана ЕККУнун эл аралык эксперти Владимир Гусев айтып берди:
"Бүгүн киберкылмыштуулуктун чек арасы жок, ага каршы натыйжалуу күрөш тыгыз эл аралык кызматташтык, тажрыйба алмашуу жана адистердин кесиптик дараметин үзгүлтүксүз өнүктүрүү шартында гана мүмкүн".
Көйгөйдүн масштабын реалдуу окуялар айгинелеп турат. BAKAIдын блогери жана амбассадору Мээрим Төлөпберген башынан өткөн жеке тажрыйбасы менен бөлүштү:
"Менин жүзүмдү шылуундук схемасында колдонушкан: маегимден үзүндү алып, аны жасалма интеллект аркылуу иштетип, “акча табуу” тууралуу жалган видео жасап чыгарышкан. Аларга жетүү дээрлик мүмкүн эмес - баары өтө профессионалдуу уюштурулган".
Форумда финансылык коопсуздукка жана санарип сабаттуулукка өзгөчө көңүл бурулду.
"Бүгүн технологиялардын өнүгүшүнө байланыштуу киберкылмыштар татаалдашып баратат. Бирок бир нерсени эстен чыгарбоо маанилүү: кылмышкерлер табылат, ал эми ар бир адам кабардар болуп, өзүн коргой билиши керек", - деп белгиледи ИИМдин Кылмыш иликтөө башкы башкармалыгынын Кибербашкармалыгынын башчысы Руслан Шаршембиев.
BAKAI технологияларга гана эмес, кардарларды окутууга да басым жасайт.
"Банкта санарип тобокелдиктерден коргоо системасы түзүлгөн - операцияларды көзөмөлдөөдөн тартып фейк аккаунттарды аныктоого чейин. Бирок негизги басым билим берүүгө багытталган: биз жогорку окуу жайлары менен кызматташып, шылуундар кандай аракеттерди жасай турганын түшүндүрөбүз. Эң башкысы - коопсуздугуңуз өз колуңузда", - деп белгиледи BAKAIдын маалыматтык коопсуздук башкармалыгынын башчысы Гулжигит Жалилов.
BAKAI Башкармасынын Төрагасынын биринчи орун басары Марат Какеев мындай деп белгиледи:
"Бүгүн биз киберкылмыштуулукка каршы туруу үчүн мамлекеттин, бизнес өкүлдөрүнүн жана эксперттердин күч-аракетин бириктирип жатабыз. BAKAI үчүн бул жөн гана өнөктөштүк эмес, кардарлардын коопсуздугу жана өлкөдөгү санарип чөйрөнүн өнүгүшү үчүн терең жоопкерчилик".
BAKAI Маркетинг департаментинин директору Айдай Мокушева мындай деп кошумчалады:
"Биз мындай демилгелерди Ички иштер министрлиги менен биргеликте ишке ашырып жатабыз, анткени бүгүн адамдар гана эмес, бизнес да жабыркап жатат. Биздин милдетибиз - күч-аракеттерди бириктирүү жана алдын ала аракеттенүү. Бул жалпы рыноктун орток жоопкерчилиги".
Форумдун жыйынтыгында катышуучулар уюштуруунун жогорку деңгээлин, талкуулардын практикалык баалуулугун жана көтөрүлгөн темалардын актуалдуулугун белгилешти. Коноктор эксперттик аналитика менен гана чектелбестен, уюмдардын деңгээлинде да, күнүмдүк турмушта да колдонууга боло турган шылуундукка каршы конкреттүү ыкмаларды алышты.
