Кыргызстанда жүгүртүүдөгү нак акчанын көлөмү 280 млрд сомдон ашты
2026-жылдын 1-апрелине карата Кыргыз Республикасында жүгүртүүдөгү нак акчанын жалпы көлөмү 280 млрд 131,5 млн сомду түздү. Бул көрсөткүч өткөн жылдын ушул мезгилине салыштырмалуу 33,6 млрд сомго же 15,3%га көбөйгөндүгүн Улуттук банктан кабарлашты.
Анын ичинен 26,9 млрд сом коммерциялык банктардын кассаларында сакталса, негизги бөлүгү — 253,1 млрд сом — банк тутумунан тышкары жүгүртүүдө колдонулуп жатат.
2026-жылдын биринчи чейрегинде коммерциялык банктардын кассаларына республика боюнча жалпы 1 трлн 383 млрд сомдон ашык каражат түшкөн. Бул көрсөткүч өткөн жылдын ушул мезгилине салыштырганда 13%га көптүк кылат.
Ошол эле учурда коммерциялык банктар аркылуу кардарларга берилген нак акчанын көлөмү 1 трлн 378 млрд сомду түзүп, өткөн жылга салыштырмалуу 11%га өскөн.
Ал эми аталган мезгил аралыгында коммерциялык банктардын кассаларына нак акчанын кайтарымдуулугу 100,4% түзүп, өткөн жылга салыштырмалуу 1,8 пайыздык пунктка жогорулаган. Бул көрсөткүчтөр өлкөдө нак акча жүгүртүүнүн активдүүлүгү жогорулап жатканын жана экономикалык операциялардын көлөмү өсүп жатканынын белгиси деп, Улуттук банктан билдиришти.
