Улуттук банк эсептик ченди 12% деңгээлинде сактап калды
КРнын Улуттук банкы эсептик ченди (негизги ченди) өзгөртүүсүз 12,00% деңгээлинде калтыруу чечимин кабыл алды. Тиешелүү чечим 2026-жылдын 28-апрелинен тартып күчүнө киргендигин Улуттук банктын төрагасынын орун басары Азат Козубеков басма сөз жыйынында билдирди.
Билдирүүгө караганда, мындай чечим өлкөдөгү инфляциялык басымдын сакталып турушу жана дүйнөлүк рыноктогу белгисиздиктер менен байланыштуу кабыл алынды.
“Өлкөдөгү учурдагы инфляциялык процесстер тышкы сыяктуу эле, ички факторлордун таасири астында калыптанууда. Мында өлкөдөгү инфляцияга негизги таасир тышкы шарттардан уланууда. Дүйнөдөгү геосаясий чыңалуу жана жогорку глобалдык белгисиздик дүйнөлүк азык-түлүк жана чийки зат рынокторунда баалардын өсүшүн шарттаган. Атап айтканда, акыркы эки айда Жакынкы Чыгыштагы кырдаалдын курчушу алкагында дан эгиндерине, өсүмдүк майларга жана энергия продукцияларга дүйнөлүк баанын өсүшү байкалууда” – деди Козубеков.
Улуттук банк өлкөдө баа туруктуулугун камсыз кылууга жана орто мөөнөттүү келечекте инфляция көрсөткүчүн 5-7%дык максаттуу көрсөткүчкө кайтаруу үчүн шарттарды түзүүгө багытталган катуулатылган акча-кредит саясатына таянууну уланта берери айтылды.
Улуттук банк Башкармасынын эсептик чен боюнча кийинки отурум 2026-жылдын 25-майына белгиленди.
