Улуттук банк банктардын чет өлкөдөгү ишин кеңейтүүгө багытталган өзгөртүүлөрдү коомдук талкууга сунуштады
Кыргыз Республикасынын Улуттук банкы айрым ченемдик укуктук актыларга өзгөртүүлөрдү киргизүүнү сунуштап, тиешелүү токтом долбоорун коомдук талкууга чыгарды.
Демилге өлкөдөгү коммерциялык банктардын чет өлкөдөгү филиалдары аркылуу ишин өркүндөтүп, финансылык туруктуулугун жана банктык көзөмөлдүн тийиштүү деңгээлин сактоо менен эл аралык каржы рыногунда атаандаштыкка жөндөмдүүлүгүн жогорулатууга багытталган.
Улуттук банктын маалыматына ылайык, өзгөртүүлөр Президенттин 2026-жылдын 6-мартындагы №106 Жарлыгын ишке ашыруу максатында даярдалган. Негизги өзгөрүүлөр:
- Кыргыз банктарынын чет өлкөлөрдөгү филиалдары аркылуу берилген айрым кредиттерди классификациялоонун жаңы тартиби киргизилет;
- Чет өлкөлөрдө ачылган филиалдардын ишмердүүлүгүнө байланыштуу айрым материалдык эмес активдерди эсепке алуу жеңилдетилет;
- Эл аралык рейтингге ээ компанияларга берилген кредиттер боюнча тобокелдик деңгээлин аныктоо тартиби такталат;
- Банктардын чет өлкөлөрдөгү ишин жөнгө салуу эл аралык стандарттарга шайкеш келтирилет.
Улуттук банктын маалыматына караганда, бул өзгөрүүлөр кошумча бюджеттик каражаттарды талап кылбайт жана социалдык же экономикалык терс кесепеттерди жаратпайт.
Токтом долбоору коомдук талкуу үчүн Улуттук банктын расмий сайтына жана коомдук талкуу порталына жайгаштырылды.
