“Элкарт” улуттук төлөм системасы эл аралык рынокто өнөктөштүгүн кеңейтүүдө
“Элкарт” улуттук төлөм системасынын төрагасы Алтымыш Туратбеков Куала-Лумпурда өткөн MoMents 2026 эл аралык форумуна катышууда. Иш-чара Ant International тарабынан уюштурулуп, эл аралык кызматташтыкты өнүктүрүүгө жана улуттук төлөм системасын дүйнөлүк рынокко илгерилетүүгө багытталган.
"Элкарт" УТСнын маалымат казымтанан кабарлагандай, форумдун алкагында бир катар жолугушуулар өтүп, негизги көңүл өнөктөштүктү кеңейтүүгө жана накталай эмес төлөмдөрдү өнүктүрүүгө бурулду.
Маанилүү жыйынтыктардын бири — Alipay+ платформасы менен интеграция ийгиликтүү аяктаганы болду. Учурда система тесттик режимде иштеп, алгачкы транзакциялар жүргүзүлдү. Долбоор жакын арада колдонуучуларга сунушталат.
Ошондой эле UnionPay International компаниясы менен биргелешкен карталык долбоор талкууланып, Пакистан жана Бангладеш компаниялары менен акча которууларды өнүктүрүү мүмкүнчүлүктөрү каралды.
MoMents форуму дүйнөнүн ар кайсы өлкөлөрүнөн банктарды жана финтех-компанияларды бириктирип, тажрыйба алмашуу жана жаңы өнөктөштүктөрдү түзүү үчүн маанилүү аянтча болуп саналат.
