Улуттук банк мыйзам бузуу менен акча алмаштырган жактарга айып пул салды
КРнын Улуттук банкы КРнын мыйзам талаптарын жана Кыргыз Республикасынын Улуттук банкынын ченемдик укуктук актыларынын талаптарын бузууга жол берген 2 акча алмашуу бюросуна жана 1 жаранга айып пул салды.
Улуттук банктын басма сөз кызматынын маалыматына ылайык, Баткен облусунда жайгашкан алмашуу бюролорунун бирине КРнын мыйзамдарды жана Улуттук банктын ченемдик укуктук актыларын бузганы үчүн 55 миң сом айып пул салынды. Ошондой эле Улуттук банктын Баткен облусундагы өкүлчүлүгү тарабынан лицензиясыз чет өлкө валютасын алмаштыруу операцияларын жүргүзгөн Кыргызстандын 1 жаранына 17 миң 500 сом айып салынганы маалым болду.
Мындан тышкары, ушундай эле мыйзам бузууга жол берген Бишкек шаарындагы дагы бир алмашуу бюросуна 55 миң сом айып пул салынды.
Азыркы тапта Кыргызстан боюнча Улуттук банктын лицензиясын алып, ишмердүүлүк жүргүзүп жаткан 889 акча алмаштыруучу жай бар.
