Жогорку Кеңеш Жарандык кодекске өзгөртүүлөрдү киргизүүнү 3-окууда кабыл алды
Бүгүн Жогорку Кеңештин жыйынында Кыргыз Республикасынын Жарандык кодексине өзгөртүүлөрдү киргизүү боюнча мыйзам долбоору 3-окууда жактырылып, кабыл алынды.
Мыйзам долбоору боюнча баяндама менен Финансы, бюджет, ишкердик жана атаандаштыкты өнүктүрүү боюнча комитетинин төрагасынын орун басары Жаныбек Абиров баяндама жасады.
Эл өкүлүнүн айтымында, долбоордун негизги максаты жарандык мамилелерди өркүндөтүү, исламдык каржылоонун инструменттерин колдонуу мүмкүнчүлүктөрүн кеңейтүү жана укуктук жөнгө салууну эл аралык тажрыйбага шайкеш келтирүү болуп саналат.
Ошондой эле документ өлкөнүн инвестициялык жагымдуулугун жогорулатууга багытталгандыгы айтылды.
“Мыйзам долбоору министрлер кабинетинин корутундусун эске алуу менен кайрадан иштелип чыгып, мыйзам долбоордун азыркы редакциясына министрлер кабинетинин жана Улуттук банктын оң корутундулары берилди. Ал эми комитет 2026-жылдын 28-апрелиндеги отурумунда аталган мыйзам долбоорун карап, ал колдоо тапты”- деп билдирди, Абиров.
Эл өкүлдөрү аталган мыйзам долбоорун суроосуз эле колдоого алып, үчүнчү окууда кабыл алып беришти.
