Улуттук банк эки жаңы банкка лицензия берди
Кыргыз Республикасынын Улуттук банкы 2026-жылдын 13-майындагы Башкарманын чечими менен эки жаңы банкка банктык операцияларды жүргүзүүгө лицензия берди.
Аталган чечимге ылайык, “Кылым Банк” ачык акционердик коомуна жана “Мурас Банк” жабык акционердик коомуна улуттук жана/же чет өлкө валютасында банктык операцияларды жүргүзүү укугу расмий түрдө ыйгарылды.
Бул лицензиялар жаңы банктарга кардарларга толук кандуу банктык кызматтарды көрсөтүүгө мүмкүнчүлүк берет.
Белгилей кетсек, акыркы эки жыл ичинде Кыргызстандын банк системасы туруктуулугун гана эмес, өсүү потенциалын да көрсөтүп жатат. 2025-жылдын аягынан бери үч жаңы банк («Берекет Банк» ЖАК, «АФБ» ЖАК жана Асман Банкы» ЖАК) каттоого алынган. Ага чейин акыркы банк 2016-жылы ачылгандыгы белгилүү болгон.
Адистердин айтымында, жаңы банктардын рынокко кириши атаандаштыкты күчөтүп, кызмат көрсөтүүнүн сапатын жакшыртат. Ошондой эле жарандар жана бизнес үчүн насыя, төлөм, депозит жана санариптик кызматтардын жаңы түрлөрү пайда болушу мүмкүн.
