Улуттук банктын нумизматикалык музейинде ачык эшик күнү өткөрүлөт
КРнын Улуттук банкы Эл аралык музей күнүнө карата бардык коллекциялык нумизматикалык баалуулуктарга кызыккан адамдарды 2026-жылдын 18-майында нумизматикалык музейде өтө турган ачык эшик күнүнө чакырат.
Улуттук банктын басма сөз кызматынын маалыматына ылайык, музейге келген адамдарга улуттук валютанын өнүгүү тарыхы, банкнотторду даярдоо баскычтары тууралуу маалымат берилет. Ошондой эле Улуу Жибек жолу доорунан тартып Кыргызстандын аймагында табылган кайталангыс байыркы монеталар экспозициясын көрүү мүмкүнчүлүгү сунушталат.
Мындан сырткары, музейде Улуттук банк тарабынан 1995-2026-жылдары чыгарылган коллекциялык монеталардын жана чет элдик акча белгилеринин үлгүлөрүнүн экспозицияларын көрүүгө болот.
Билдирүүгө караганда, экскурсия Улуттук банктын Бишкек шаары, Киев көчөсү, 189 дарегинде (К. Акиев көчөсү менен кесилишет) саат 10.00дон 17.00гө чейин өтөт. Кирүү акысыз. Экскурсияга келүүчүлөрдүн жанында инсандыгын тастыктаган документ (паспорт, студенттик билет, айдоочулук күбөлүгү) болууга тийиш.
💡
Экскурсияга төмөнкү телефондор аркылуу алдын ала жазылуу шартталат: 0 (312) 61-24-14; 0 (312) 66-90-15 (+1232; +1234) же mail@nbkr.kg электрондук дарек аркылуу жазылса болот.
