Евразия борбордук банктарынын кеңешинин отуруму болду
Бишкек шаарында Евразия борбордук (улуттук) банктарынын кеңешинин 54-отуруму болуп өттү. ЕБК мүчөлөрү болуп - Россия Федерациясынын Борбордук банкы, Армян Республикасынын Борбордук банкы, Беларусь Республикасынын Улуттук банкы, Казакстан Республикасынын Улуттук банкы, Кыргыз Республикасынын Улуттук банкы жана Тажикстандын Улуттук банкы саналат.
КРнын Улуттук банкынын билдирүүсүнө караганда, 54-отурумда тараптар банк секторун өнүктүрүү келечегин, өлкөлөрдүн виртуалдык активдерин жөнгө салуу боюнча тажрыйбасын, ошондой эле Евразия мейкиндигиндеги интеграциялык процесстердин ЕБК өлкөлөрүнүн төлөм теңдеминин көрсөткүчтөрүнө таасирин талкуулашты.
Айрыкча туруктуу өнүктүрүүнү каржылоо рыногун андан ары өнүктүрүү маселесине өзгөчө көңүл бурулду.
Отурумдун жыйынтыгында тараптар борбордук (улуттук) банктардын ишинин ар кандай багыттары боюнча мындан ары да тажрыйба алмашууга жана өз ара иш алып барууну бекемдөөгө даяр экендигин ырасташты.
Кеңештин милдети болуп, финансы-банк чөйрөсүндө интеграцияны тереңдетүү, улуттук валюталык-финансылык жана банк системаларын өнүктүрүү маселелери боюнча тараптардын иш-аракеттерин координациялоо, көп тараптуу жана эки тараптуу төлөм-эсептешүү мамилелерин өркүндөтүү жана ЕБК жөнүндө макулдашууга катышкан борбордук (улуттук) банктардын компетенциясынын алкагындагы башка маселелер саналат.
