Улуттук банк банктар үчүн киберкоопсуздук талаптарын күчөтүүнү сунуштайт
КРнын Улуттук банкы коммерциялык банктар үчүн маалыматтык коопсуздук жана киберкоопсуздук талаптарын күчөтүүнү караган токтом долбоорун 7-июлда коомдук талкууга чыгарган.
Документтин негизги максаты – Улуттук банктын ченемдик укуктук актыларын «Кыргыз Республикасынын киберкоопсуздугу жөнүндө» мыйзамга шайкеш келтирүү жана банк секторун санарип сомду ишке киргизүүгө даярдоо болуп саналат.
Долбоорго ылайык, коммерциялык банктар үчүн ISO/IEC 27001:2022 эл аралык маалыматтык коопсуздук стандарты милдеттүү түрдө киргизилип, ага ылайык сертификациядан өтүү талабы коюлат. Мындан тышкары, документте:
- маалыматтык коопсуздук боюнча инциденттер тууралуу Улуттук банкка милдеттүү түрдө маалымдоо;
- программалык камсыздоону коопсуз иштеп чыгуу жана тестирлөө талаптарын күчөтүү;
- мобилдик тиркемелердин сапатын жана коопсуздугун жакшыртуу;
- алдамчылыкка каршы кошумча техникалык чараларды киргизүү;
- маалыматтык инфраструктуранын физикалык коопсуздугун күчөтүү;
- аутсорсингдик компанияларга жана кызмат көрсөтүүчүлөргө карата талаптарды катаалдаштыруу сунушталган.
Улуттук банк белгилегендей, сунушталган өзгөртүүлөр банк секторунун кибертуруктуулугун жогорулатып, санариптик кызматтардын, анын ичинде санарип сомдун коопсуз жана үзгүлтүксүз иштешин камсыздоого багытталган. Ошондой эле жаңы талаптар алдамчылык фактыларын азайтууга көмөк көрсөтөрү күтүлүүдө.
Токтом долбоорун кабыл алуу мамлекеттик бюджеттен кошумча каражатты талап кылбайт жана жарандардын же юридикалык жактардын укуктарын чектебейт. Долбоордун коомчулук тарабынан талкууланышы 27-июлга чейин созулат.
