Борбордук банктар санарип финансы боюнча кызматташат
ЕАЭБ мүчө мамлекеттердин борбордук (улуттук) банктарынын Валюта саясаты боюнча консультациялык кеңешинин 30-отуруму болуп өттү. Катышуучулар отурумдун жүрүшүндө ЕАЭБ өлкөлөрүндө орун алган макроэкономикалык жагдайды жана ишке ашырылып жаткан акча-кредит саясатын талкуулашты.
Жыйынга Россиянын Борбордук банкынын төрайымы - Эльвира Набиуллина, Армениянын Борбордук банкынын төрагасы - Мартын Галстян, Беларусь Улуттук банкынын төрагасынын орун басары - Александр Егоров, Казакстандын Улуттук банкынын төрагасынын орун басары - Ерулан Жамаубаев жана Кыргыз Республикасынын Улуттук банкынын төрагасы - Алмаз Бакетаев баштаган делегациялар катышты.
КРнын Улуттук банкынын маалыматына караганда, отурумдун жүрүшүндө катышуучулар кредиттик уюмдардын ишмердүүлүгүнө тиешелүү ченемдер, финансы рынокторунда жасалма интеллектти жөнгө салуу жана өнүктүрүү маселелери боюнча өз ара пикир алмашты.
Жыйындын жыйынтыгында, тараптар ЕАЭБге мүчө мамлекеттердин санарип финансы инфраструктурасын өнүктүрүү жаатындагы кызматташуу жөнүндө меморандумга кол коюшту.
Документ санариптик финансылык кызматтарды өнүктүрүүдө өлкөлөр ортосундагы өз ара кызматташтыкты бекемдөөгө жана тажрыйба алмашууга багытталган.
