Улуттук банк мыйзам бузган акча алмаштыруучу жайларга чара көрдү
Өткөн аптада мыйзам талаптарын жана Улуттук банктын нормативдик укуктук актыларын бузган учурлар боюнча бир катар таасир этүүчү чаралар кабыл алынды.
Улуттук банк жарыялаган расмий маалыматка ылайык, Жалал-Абад облусунда жайгашкан бир акча алмаштыруу бюросуна мыйзам талаптарын бузгандыгы үчүн 55 миң сом өлчөмүндө айып пул салынды.
Ошондой эле Бишкек шаарында лицензиясы жок накталай чет өлкө валютасын алмаштыруу ишин жүргүзгөн 6 жаранга ар бирине 17 миң 500 сомдон айып пул салынды.
Мындан тышкары, айрым алмашуу бюролорунун лицензиялары убактылуу токтотулду. Тактап айтканда, Бишкек шаарындагы «Про мани» алмашуу бюросунун лицензиясынын аракети 2026-жылдын 25-июлунан 27-июлуна чейин токтотулду.
Ал эми Чоң-Капка көзөмөл-өткөрүү пунктунун жанында жайгашкан "Лидер 07" алмашуу бюросунун лицензиясы 24-июлдан 7-августка чейин убактылуу токтотулду.
Улуттук банк жарандарды валюта алмаштыруу операцияларын лицензиясы бар алмашуу бюролору аркылуу гана жүргүзүүгө чакырат.
