Накталай рубль боюнча жагдайга Улуттук банк түшүндүрмө берди
Акыркы күндөрү Кыргызстанда айрым коммерциялык банктардын накталай орус рублин кабыл алууну чектегени тууралуу коомчулукта талкуу жаралды. Өзгөчө туристтик сезон кызуу жүрүп жаткан учурда бул жагдай россиялык туристтер үчүн ыңгайсыздык алып келиши мүмкүн деген кооптонуулар социалдык түйүндөрдө жарыяланууда. Ушуга байланыштуу “Ишкер медиа” КРнын Улуттук банкына кайрылып түшүндүрмө алды.
Улуттук банктын басма сөз кызматынын маалыматына ылайык, акыркы мезгилде Россиянын коммерциялык банктары чет өлкөлүк банктардан, анын ичинде Кыргызстандын коммерциялык банктарынан накталай рублди кабыл алууга көзөмөлдү күчөтүүдө.
“Белгилей кетүүчү жагдай, Казакстан Республикасынын, Армениянын, Грузиянын, Тажикстандын жана Өзбекстандын банктары да ушул сыяктуу кырдаалга туш болушту. Казакстандын коммерциялык банктары кассаларында орусиялык рубль менен накталай акча каражаттарын кабыл алуу үчүн төлөмдөрдү киргизишти; айрым Армениянын каржы институттары орусиялык рубл менен накталай акча которууларды толугу менен токтотушту.” – дейт КРУБдун маалыматында.
Мунун кесепетинен кыргызстандык банктар орус рубли менен накталай акча которууларды жүргүзүү мүмкүнчүлүгүн чектеп, ошого жараша жогорулаган чыгымдарды жабуу жана операциялык тобокелдиктерди минималдаштыруу үчүн тарифтерин кайра карап чыгууга алып келгендиги белгилүү болду:
“Бул чектөөлөр орусиялык рубл менен накталай акча которууларга гана тиешелүү экенин жана акча которууларды кошо алганда накталай эмес төлөмдөргө таасир этпей турганын эске алыңыз. Улуттук банк коммерциялык банктар тарабынан орусиялык рубль менен накталай акча каражаттарын кабыл алууга эч кандай чектөөлөрдү киргизген жок жана мындай операцияларды чектөө боюнча эч кандай сунуштар берилген эмес.”
Улуттук банктын маалыматына караганда, Кыргыз Республикасынын мыйзамдарына ылайык, банктык кызматтар үчүн төлөмдөрдү кошо алганда, тарифтик саясатты түзүү коммерциялык банктардын өздөрүнүн компетенциясына кирет. Андыктан операциялык тобокелдиктерге жана экономикалык мүмкүнчүлүктөргө негизделип, бул саясат өз алдынча жүргүзүлөт.
