Улуттук банк валюта рыногуна 196,2 млн доллар сатты
Улуттук банк 10-августта интервенция жасап, валюта рыногуна 196,2 млн доллар сатты. Бул тууралуу банктын расмий сайтында маалымдалды.
Маалыматка ылайык, 41 млн доллар бүтүмгө келишилген күндөгү эсептөөлөр менен сатылса, калган 155,2 млн доллар башка күндөгү эсептөөлөр менен сатылган.
Белгиленгендей, бул Улуттук банктын 2026-жылдагы 10-валюталык интервенциясы жана көлөмү боюнча жыл башынан берки экинчи ири валюталык сатуусу.
Эске салсак, эң ири интервенция 29-июнда жүргүзүлүп, анда 222,55 млн доллар сатылган. Жалпысынан, 10-августтагы операцияны кошкондо, Улуттук банк жыл башынан бери валюта рыногунда 1,6688 млрд доллар сатты.
Ал эми быйыл АКШ долларын сатып алуу боюнча интервенциялар жүргүзүлө элек.
Улуттук банктын валюта рыногундагы интервенциялары, анын ичинде чет өлкө валютасын сатуу операциялары, ички рыноктогу суроо-талап менен сунуштун тең салмактуулугун камсыз кылууга жана сомдун кескин серпилүүсүн азайтууга багытталат.
