Салык кызматы ишкерлерди ЭСФ 2.0 системасын сыноого катышууга чакырууда
Мамлекеттик салык кызматы ЭСФ 2.0 электрондук эсеп-фактурасынын жаңы модулун пилоттук режимде ишке киргизип, ишкерлерди аны сыноого катышууга чакырды.
Салык кызматынын алдындагы «Салык Сервис» Мамлекеттик мекемесинин маалыматына ылайык, ишкерлер жаңы системаны колдонуп гана тим болбостон, анын мындан аркы иштешине сунуш-пикирлери аркылуу таасир эте алышат. Ишкерлердин сунуштары системаны акыркы иштеп чыгууда эске алынышы мүмкүн.
ЭСФ 2.0 2026-жылдын 1-сентябрынан тартып этап-этабы менен киргизилет. Биринчи этапта система расмий түрдө төмөнкү товарларга колдонулат:
- мунай жана мунайзаттары;
- ЕАЭБ алкагында көзөмөлгө алынуучу айрым товарлар, анын ичинде тиричилик муздаткычтары жана тоңдургучтар;
- кир жуучу машиналар;
- телекөрсөтүү аркылуу байланыш үчүн кабыл алуучу аппаратуралар.
Башка товарлар үчүн ЭСФ 2.0 азырынча пилоттук режимде гана жеткиликтүү болот. Анын ичинде алкоголдук жана тамеки продукциялары да бар.
Билдирүүгө караганда, пилоттук долбоорго катышкан ишкерлер жаңы системаны алгачкылардан болуп сынап, иштеп чыгуучуларга түз сунуш берип, аны бизнеске ыңгайлуу кылууга катыша алышат. Ал эми ЭСФ 2.0 расмий түрдө толук ишке киргенге чейин азыркы форматтагы ЭСФти колдонуу милдеттүү бойдон кала берет.
Пилоттук долбоорго катышууну каалаган ишкерлер 0 (312) 62-08-55 номери аркылуу байланышса болот.
