Россияда банктардын 2 миңден ашуун бөлүмү жабылышы мүмкүн
Россияда банктар офлайн бөлүмдөрүнүн санын кыскартууну улантууда. "Известия" басылмасынын маалыматына ылайык, учурдагы темп сакталса, 2026-жылдын аягына чейин дагы 2,1 миңден ашык банк бөлүмдөрү жабылышы мүмкүн. Бул акыркы жылдардагы эң жогорку көрсөткүч болуп саналат.
Билдирүүгө ылайык, 2026-жылдын январь–август айларынын аралыгында эле Россиянын банктары 1 370 кошумча кеңсесин жапкан. Орточо эсеп менен айына 196 бөлүм ишин токтоткон. Бул өткөн жылдагы көрсөткүчтөн болжол менен эки эсеге көптүк кылат.
Жабылган бөлүмдөрдүн 40%га жакыны Сбербанкка туура келет, бул банк 540ка жакын кеңсесин жапкан.
Бул тенденциянын негизги себеби - кардарлардын жүрүм-турумунун өзгөрүшүндө, деп ПСБ банк жана финансы рыногун талдоо бөлүмүнүн башчысы Дмитрий Грицкевич билдирген. Анын айтымында көпчүлүк күнүмдүк операцияларды мобилдик тиркемелер жана интернет-банкинг аркылуу жүргүзүүгө болот, ал эми накталай акча операцияларын банкоматтар аткарат.
Ошол эле учурда банктар филиалдардан толугу менен баш тартууну көздөбөйт. Айрым финансылык уюмдар жаңы бөлүмдөрдү дагы ачууну пландап жатышат.
Эксперттердин айтымында, узак мөөнөттүү келечекте Россиядагы банк кеңселеринин саны дагы кыйла азайып, кийинки беш жылда 2–2,5 эсеге чейин кыскарышы мүмкүн. Анткени менен офлайн-тейлөө кызматын толугу менен жокко чыгаруу планда жок.
