Улуттук банк төлөм уюмуна 220 миң сом айып салды
Кыргыз Республикасынын Улуттук банкы КРнын мыйзамдарын жана Улуттук банктын ченемдик укуктук актыларынын талаптарын бузгандыгы үчүн, Бишкек шаарында жайгашкан төлөм уюмуна/төлөм системасынын операторуна жалпы суммасы 220 миң сомду өлчөмүндө айып пул салды.
КРУБ маалыматына ылайык, айып пул төмөнкүдөй мыйзам бузуулар үчүн белгиленди:
- КРнын банк мыйзамдарына ылайык, ыйгарым укуктуу мамлекеттик органдардын милдеттүү талаптарын аткарбаган;
- КРнын кылмыштуу ишти каржылоого жана кылмыштуу кирешелерди адалдоого каршы аракеттенүү чөйрөсүндөгү мыйзамдарынын ички көзөмөл системасын уюштуруу бөлүгүн аткарбаган.
Ал эми айып салынган төлөм уюмунун аталышын Улуттук банк ачыктаган жок.
Учурда Улуттук банктын лицензиясынын негизинде өлкөдө 55 төлөм системасынын оператору жана төлөм уюму иш алып барып жатат. Алардын бардыгы Бишкек шаарында жайгашкан.
Белгилей кетсек, төлөм уюмдары товарлар жана кызмат көрсөтүүлөр үчүн төлөмдөрдү кабыл алуу, өткөрүү жана эсептешүү кызматтарын көрсөтсө, төлөм системасынын операторлору төлөмдөр боюнча финансылык маалыматтарды кабыл алуу, иштеп чыгуу (процессинг, клиринг) жана катышуучуларга жеткирүү функцияларын аткарат.
