Улуттук банк 2026-жылдын II чейрегинде ФКУга 500дөн ашык таасир этүү чарасын колдонду
КРнын Улуттук банкы 2026-жылдын II чейрегинде коммерциялык банктарга, банк эмес финансы-кредиттик уюмдарга жана башка көзөмөлдөгү субъекттерге карата бир катар таасир этүү чараларын колдонду.
Улуттук банктын расмий маалыматтарына таянсак, коммерциялык банктарга карата апрель–июнь айларында 6 эскертүү берилип, 22 жазма буйрук жөнөтүлгөн. Ошондой эле 1 айыптык төлөм салынган. Бул мезгилде Улуттук банктын Көзөмөл боюнча комитетинин 15 отурумун өткөрүп, анда коммерциялык банктардын ишине байланыштуу 35 маселени кароого алган.
Ал эми банк эмес жана адистештирилген финансы-кредиттик уюмдарга жүргүзүлгөн инспектордук текшерүүлөрдүн жыйынтыгында бир катар иш-чаралар кабыл алынган.
Маалыматка ылайык, инспектордук текшерүүнүн натыйжасында - микрофинансылык уюмдарга 30, кредиттик союздарга 29, кредиттик бюрого 1, ал эми алмашуу бюролоруна 26 жазма буйрук берилген.
Мындан тышкары, алмашуу бюролорунун ишмердиги боюнча 24 убактылуу токтотуу чарасы колдонулуп, 24 айыптык төлөм салынган. Тышкы көзөмөлдүн натыйжасында дагы негизги чаралар алмашуу бюролоруна карата көрүлгөн. Алардын ичинен:
- алмашуу бюролоруна — 356 жазма буйрук, 2 - лицензиясын убактылуу токтотуу, 12 - айып пул салуу каралган, 20 - алмашуу бюросунун лицензиясын кайтарып алуу;
- микрофинансылык уюмдарга — 11 жазма буйрук, 1 - алмашуу бюросунун лицензиясын кайтарып алуу;
- кредиттик союздарга — 8 жазма буйрук берилген;
Улуттук банктын маалыматы көрсөткөндөй, 2026-жылдын II чейрегинде банк жана банк эмес финансы секторунда көзөмөлдөө жана талаптарды аткарууну камсыз кылуу боюнча чаралар өзгөчө алмашуу бюролоруна карата активдүү болгонун.
Белгилей кетсек, Улуттук банктын алмашуу бюролорунун 2026-жылдын 14-августуна карата абалы боюнча реестрине ылайык, Кыргызстанда азыр жалпы 896 алмашуу бюросу ишмердүүлүк жүргүзүп жатат.
