Улуттук банк баалуу металдардан жасалган 78-коллекциялык монетасын жүгүртүүгө чыгарды
Бүгүн КРнын Улуттук банкы “Дүйнөлүк көчмөндөр оюндары” сериясындагы “Тайган жарыш” күмүш монетасын жүгүртүүгө чыгарды. Билдирүүгө караганда, монета VI “Дүйнөлүк көчмөндөр оюндары – 2026” иш-чарасына арналган жана кыргыз элинин маданий мурастарын сактоо жана жайылтуу максатында чыгарылды.
“Тайган жарыш” - бул илгертен эле ар кандай элдик майрамдарда өткөрүлүп келген жана ал бүгүнкү күндө да өз актуалдуулугун жоготпой, расмий түрдө Дүйнөлүк көчмөндөр оюндарынын программасына киргизилген.
Монетанын алдыңкы бетине кыргыз тоолорунун фонунда жарышка катышкан үч тайгандын элеси чагылдырылган. Монетанын арткы бетинин борборунда герб жана кыргыздын накта күлүк итинин тукуму болгон - тайгандын башы чоңойтулуп түшүрүлгөн.
Монетанын номиналы - 10 сом, металлдын сапат белгиси -Ag 925 жана салмагы -28,28 гр. “Тайган жарыш” коллекциялык монетасы, буга чейинки башка монеталар сыяктуу эле КРнын аймагында расмий төлөм каражаты статусуна ээ. Анан көрсөтүлгөн номиналы 10 сом болгону менен өздүк наркы Улуттук банктын жүгүртүү кассаларында - 8 900 сомдон сатылууда.
Бул монета Улуттук банк тарабынан 78-баалуу металдардан жасалган монета, ал эми “Дүйнөлүк көчмөндөр оюндары” сериясындагы 5-монета болуп саналат.
