Улуттук банк эсептик чендин өлчөмүн 12,00 % деңгээлинде калтырды
КРнын Улуттук банкынын Башкармасы эсептик ченди 12,00 % деңгээлинде сактоо чечимин кабыл алды. Акыркы жолу эсептик чен 2026-жылдын февраль айында 11%дан 12%га жогорулаган. Улуттук банктын өкүлдөрүнүн билдирүүсунө караганда, тышкы шарттар өлкөдөгү баалардын динамикасын аныктоочу негизги фактор бойдон калууда.
Эсептик ченге байланышкан басма сөз жыйынынын жүрүшүндө төраганын орун басары Азат Козубеков дүйнөдө болуп жаткан геосаясий чыңалууларга байланыштуу, дүйнөлүк товардык-чийки зат рынокторунда баалардын өзгөрүшү импорттолгон товарлардын баасына таасирин тийгизип жатканын билдирди. Анын айтымында, 2026-жылдын башынан бери КРда керектөө баалары 7,3 % өстү, ал эми жылдык инфляция 11,7 % түздү.
“Акыркы айларда тышкы таасирдин натыйжасында, азык-түлүк бааларынын өсүшүнө таасирин тийгизди. Ички баалар үстүбүздөгү жылдын башынан бери 6,3%, ал эми азык-түлүктөн башка товарларга 5,8 % өстү. Кызмат көрсөтүү чөйрөсүндө баа динамикасына ички факторлор таасирин тийгизген, ал 11,1 % өсктү”- деп, билдирди Козубеков.
Козубековдун айтымында, 2026-жылдын январь-июль айларында ИДӨнүн реалдуу өсүш арымы 11,1 % түзгөн. Улуттук банк банк системасындагы ашыкча ликвиддүүлүктү активдүү жөнгө салуу менен инфляцияга акчалай салымды чектөөдө.
“Инфляцияга түрткү берүүчү сакталып турган тышкы тобокелдиктер азырынча күчөтүлгөн акча-кредит шарттарын сактоону талап кылат. Мындай шарттарда Улуттук банктын эсептик ченин сактоо боюнча учурдагы чечим инфляциянын тышкы факторлордон экинчилик таасирин чектөөгө жардам берет жана орто мөөнөттүү келечекте инфляциянын туруктуу төмөндөшү үчүн өбөлгө түзөт” – деп билдирди Улуттук банктын төрагасынын орун басары.
Улуттук банк Башкармасынын эсептик чен өлчөмү боюнча кийинки пландык отуруму 2026-жылдын 26-октябрында өтөт.
