Улуттук банк накталай рублге байланыштуу кырдаалга түшүндүрмө берди
Евразия экономикалык биримдигине кирген өлкөлөрдүн банктарында накталай орус рубли менен жүргүзүлгөн операцияларга коюлган талаптар күчөтүлүүдө. Бул көрүнүш Кыргызстанда да байкалып, валюта рыногунда рубль менен операция жүргүзгөндөр үчүн көйгөй жаратууда.
Эл аралык ЖМКнын маалыматтарына таянсак, Казакстан менен Беларуста айрым банктар накталай рубль менен операциялар үчүн комиссияны 10–20%га чейин жогорулаткан. Кыргызстанда да айрым операциялар боюнча ушундай комиссиялар киргизилүүдө.
Бүгүн КРнын Улуттук банкынын төрагасынын орун басары Азат Козубеков накталай рубль менен байланышкан операцияларда бул жагдай чынында эле бар экенин тастыктады.
“Накталай эмес рубль операцияларында өзгөрүү жок. Башкача айтканда, банктык эсептер аркылуу рублди которууда, кабыл алууда эч кандай кошумча комиссия алынбайт. Ал эми накталай рублди банктык эсепке салууда же аны башка валютага алмаштырууда комиссиялар каралып жатат. Мындай өзгөрүүлөрдүн негизги себеби катары РФнын көзөмөлдөөчү органдары тарабынан киргизилген чектөөлөргө байланыштуу” – деди, төраганын орун басары.
Козубековдун айтымында, накталай рублдин жүгүртүлүшүнө байланыштуу чектөөлөр Кыргызстанга гана эмес, ЕАЭБге кирген башка өлкөлөргө жана рублдин накталай жүгүртүүсү бар айрым башка мамлекеттерге да таасирин тийгизүүдө.
