Экономика министрлиги банктык аманаттарды коргоону күчөтүүнү сунуштоодо
Экономика жана коммерция министрлиги жарандардын банктык аманаттарын коргоону күчөтүүнү сунуштап жатат.
Бүгүнкү күндө мамлекет миллион сомго чейинки өлчөмдөгү аманаттарды төлөп берүүгө кепилдик берет. Бул максатта 2008-жылдан бери аманаттарды коргоо фонду иштеп келет, ага банктар жыл сайын аманаттардын көлөмүнүн 0,2%га барабар суммасын которуп турууга тийиш.
Бирок бир нече жылдын ичинде эл акчаны көбүрөөк сала баштаган, тагыраагы, кепилденген аманаттардын көлөмү 10 эсеге, ал эми фонддогу каражаттын көлөмү үч эсеге жетпеген өлчөмдө көбөйгөн. Азыркы тапта ал депозиттин 4,3%ын гана жабат, бирок мыйзам боюнча, минималдуу чек 12%ды түзүшү керек.
Экономика министрлиги мындан улам жаңы коюмдарды бекитүүнү сунуштаган мыйзам долбоорун иштеп чыкты. Банктын туруктуулугуна жана кабыл алынуучу тобокелдиктердин деңгээлине жараша алар жалпы депозиттик базанын 0,4-0,5% ын түзөт.
Министрлик бул чара элдин банктарга болгон ишенимин бекемдеп, аманаттарды коргоо системасын туруктуураак кылат деп белгилейт.
