Бишкекте кыргыз-кытай кызматташтыгынын жаңы багыттары каралды
Министрлер Кабинетинин Төрагасы Адылбек Касымалиев Кытай Эл Республикасынын Коргоо министри, Мамлекеттик кеңешинин мүчөсү адмирал Дун Цзюнь менен жолугушту. Бул тууралуу Өкмөттүн Басма сөз кызматынан билдиришти.
Жолугушуунун жүрүшүндө тараптар Кыргызстан менен Кытайдын ортосундагы кызматташтыктын учурдагы абалын жана келечегин талкуулашты. Белгиленгендей, Кыргызстандын Президенти Садыр Жапаров менен Кытайдын Төрагасы Си Цзиньпиндин буга чейинки жолугушууларында жетишилген макулдашуулардын негизинде эки өлкөнүн кызматташтыгы акыркы жылдары ар кыл тармактарда ыкчам өнүгүүдө.
Адылбек Касымалиев Кыргызстан акыркы беш жыл ичинде туруктуу экономикалык өсүшкө жетишкенин белгилеп, бул багытта Кытай инвестицияларынын маанилүү ролу бар экенин айтты. Анын айтымында, Кыргызстан Кытайды негизги стратегиялык өнөктөштөрдүн бири катары карайт жана кызматташууну мындан ары да тереңдетүүгө кызыкдар.
“Биз соода-экономикалык, илимий-техникалык, маданий-гуманитардык чөйрөлөрдө, ошондой эле коопсуздук жана коргонуу тармагында кызматташууну кеңейтүүгө умтулабыз. Эл аралык уюмдардын алкагында да активдүү иш алып баруудабыз”, – деди ал.
Өз кезегинде Кытайдын Коргоо министри Дун Цзюнь Кытай өкмөтүнүн саламын жолдоп, эки өлкө ортосундагы ар тараптуу кызматташтыкты, анын ичинде аскерий жана коопсуздук багытындагы өнөктөштүктү мындан ары да өнүктүрүү маанилүү экенин белгиледи.
Белгилей кетсек, Дун Цзюнь Кыргызстанга Бишкекте өтө турган Шанхай кызматташтык уюмуна мүчө мамлекеттердин коргоо ведомстволорунун жетекчилеринин жыйынына катышуу үчүн келген. Быйыл бул уюмга Кыргызстан төрагалык кылууда.
