Кыргыз-тажик парламенттик кызматташтыгы талкууланды
Жогорку Кеңештин төрагасы Марлен Маматалиев Тажикстандын Кыргызстандагы элчиси Назирмад Ализода менен жолугушту. Бул тууралуу ЖКнын Басма сөз кызматынан билдиришти.
Парламенттин басма сөз кызматы билдиргендей, жолугушууда эки өлкө ортосундагы кызматташтык маселелери талкууланып, парламенттер аралык байланышты өнүктүрүү боюнча пикир алмашуу болду.
Марлен Маматалиев кыргыз-тажик элдери тарыхый коңшу экенин белгилеп, эки тараптуу мамилелерди мындан ары бекемдөөгө кызыкдар экенин айтты. Анын айтымында, мамлекеттик чек аралардын такталышы кызматташтыкты жаңы деңгээлге чыгарууга шарт түздү.
“Эми соода-экономикалык жана маданий байланыштарды кеңейтүүдө парламенттик дипломатиянын ролун күчөтүп, жетишилген келишимдерди ишке ашырууга көмөк көрсөтүү маанилүү”, – деди төрага.
Ошондой эле ал парламенттер аралык кызматташтыкты тармактык комитеттер жана депутаттык достук топтор аркылуу да өнүктүрүү зарылдыгын белгилеп, КМШ ПАА жана ЖККУ ПА сыяктуу эл аралык аянтчаларда активдүү иш алып баруунун маанисине токтолду.
Жолугушууда парламенттер аралык кызматташтык тууралуу меморандумга кол коюу сунушталып, бул документ эки өлкө ортосундагы байланыштарды мындан ары өнүктүрүүгө өбөлгө болору белгиленди.
Өз кезегинде элчи Назирмад Ализода эки өлкө лидерлеринин саясий эркинин негизинде чек ара маселеси чечилип, кызматташтыктын жаңы этабы башталганын белгиледи. Ал эми мындан ары парламенттер аралык байланыштарды күчөтүү зарылдыгын кошумчалады.
Жыйынтыгында тараптар биргелешкен долбоорлорду ишке ашыруу жана эки тараптуу иш сапарларды активдештирүү боюнча сунуштарын билдиришти.
