Министрлер Кабинетинде эл аралык санкциялар маселеси талкууланды
Министрлер Кабинетинин Төрагасы Адылбек Касымалиев эл аралык санкциялар маселеси боюнча жумушчу кеңешме өткөрдү. Бул тууралуу Өкмөттүн Басма сөз кызматынан билдиришти.
Кеңешмеге мамлекеттик органдардын жана тиешелүү ведомстволордун өкүлдөрү катышты. Жыйындын жүрүшүндө учурдагы кырдаал, тобокелдиктер жана колдонулуп жаткан чектөөлөрдүн мүмкүн болуучу кесепеттери талкууланды. Ошондой эле аларды этап-этабы менен жеңилдетүү боюнча сунуштар каралды.
Мамлекеттик органдар тарабынан эл аралык милдеттенмелерди аткаруу, тышкы экономикалык ишмердүүлүктүн ачыктыгын жогорулатуу жана экспорттук-импорттук операцияларга көзөмөлдү күчөтүү багытында жүргүзүлүп жаткан иштер тууралуу маалымат берилди.
Мындан тышкары, Кыргызстан менен батыштык өнөктөштөрдүн ортосундагы санкциялык маселелер боюнча туруктуу диалогду улантуунун мааниси белгиленди.
Кеңешменин жыйынтыгында мамлекеттик органдарга терс кесепеттерди азайтуу, ошондой эле кыргыз компанияларын батыш өлкөлөрүнүн санкциялык тизмелеринен чыгарууга багытталган комплекстүү чараларды иштеп чыгуу боюнча тиешелүү тапшырмалар берилди.
