МинКаб жер участокторун берүү боюнча жаңы өзгөртүүлөрдү кабыл алды
Министрлер Кабинетинин төрагасы Адылбек Касымалиевдин жетекчилиги алдында Министрлер Кабинетинин кезектеги жыйыны өттү. Бул тууралуу Өкмөттүн Басма сөз кызматынан билдиришти.
Жыйындын жүрүшүндө “Кыргыз Республикасынын Жер кодексине шайкеш келтирүү максатында Министрлер Кабинетинин айрым чечимдерине өзгөртүүлөрдү киргизүү жөнүндө” токтомдун долбоору каралып, жактырылды.
Бул маселе боюнча Жер ресурстары, кадастр, геодезия жана картография боюнча мамлекеттик агенттиктин баяндамасы угулду.
Кабыл алынган чечимге ылайык, муниципалдык жана мамлекеттик менчиктеги жер участокторун берүү, запастагы жерлерди пайдалануу жана жер кадастры боюнча жоболорго өзгөртүүлөр киргизилди.
Ошондой эле жаңы редакциядагы Жер кодексине ылайык жер участокторун берүү жол-жоболорун жөнөкөйлөтүү, электрондук форматтагы кызматтарды киргизүү жана мамлекеттик менен муниципалдык жерлерди натыйжалуу пайдалануу каралган.
Адылбек Касымалиев бул токтом өзгөчө улуттук жана инвестициялык долбоорлор үчүн маанилүү экенин белгиледи.
Токтом расмий жарыяланган күндөн тартып он күндөн кийин күчүнө кирет.
