Кыргызстан менен Түркмөнстан парламенттик алакаларды күчөтөт
Жогорку Кеңештин төрагасы Марлен Маматалиев Санкт-Петербург шаарында КМШ ПААнын иш-чараларынын алкагында Түркмөнстандын Межлисинин төрайымы Дуньягозель Гулманова менен жолугушуу өткөрдү.
Парламенттен билдиришкендей, сүйлөшүүнүн жүрүшүндө тараптар кыргыз-түркмөн стратегиялык өнөктөштүгүн, парламенттер аралык байланышты жана маданий-гуманитардык кызматташтыкты кеңейтүү маселелерин талкуулашты.
Марлен Маматалиев Кыргызстан эки тараптуу мамилелерди өнүктүрүү үчүн туруктуу саясий жана парламенттик диалогго өзгөчө маани берерин белгиледи. Ошондой эле ал парламенттик делегациялардын жана достук топторунун өз ара сапарларын активдештирүүнү сунуштады.
Төрага Кыргызстан Түркмөнстанды маанилүү соода-экономикалык жана инвестициялык өнөктөш катары көрөрүн айтып, 2020–2024-жылдары эки өлкө ортосундагы товар жүгүртүү 8,4 эсеге өскөнүн белгиледи.
Өз кезегинде Дуньягозель Гулманова эки өлкө ортосундагы кызматташтык жогорку деңгээлде өнүгүп жатканын айтып, өз ара кызыкчылык жараткан бардык багыттар боюнча алакаларды кеңейтүүгө даяр экенин билдирди.
Мындан тышкары, ал Кыргызстан тарапты 2026-жылы Ашхабад шаарында өтө турган КМШ ПААнын жыйынына катышууга чакырды.
Жолугушуунун соңунда тараптар парламенттер аралык кызматташтыкты мындан ары өнүктүрүүгө кызыкдар экенин белгилешти.
