Жергиликтүү бийликтин ишин жакшыртуу боюнча Жарлык кабыл алынды
Президент Садыр Жапаров жергиликтүү аткаруу бийлигинин органдарынын жана жергиликтүү өз алдынча башкаруу органдарынын жарандар менен иш алып баруу натыйжалуулугун жогорулатууга багытталган Жарлыкка кол койду.
Документ жарандардын кайрылууларын өз убагында кароо, калкка көрсөтүлүүчү кызматтардын сапатын жогорулатуу жана жарандар үчүн ыңгайлуу шарттарды түзүү максатында кабыл алынган.
Жарлыкка ылайык, жергиликтүү бийлик органдарында түз телефон байланыштары уюштурулуп, көчмө жеке кабыл алуулар өткөрүлөт. Ошондой эле коомдук кабылдамаларды түзүү, санариптик сервистерди өнүктүрүү жана "ишеним телефондорунун" ишин жакшыртуу каралган.
Мындан тышкары, жарандар жана юридикалык жактар менен иштөөдө кызмат адамдарынын кызматтык этикасын жана жоопкерчилигин күчөтүү боюнча чаралар белгиленди.
Документте мамлекеттик органдардын ачык-айкындуулугун жана жеткиликтүүлүгүн жогорулатуу, калк менен кайтарым байланыштын заманбап санариптик механизмдерин киргизүү жана жарандардын кайрылууларына ыкчам жооп берүү маселелерине өзгөчө көңүл бурулган.
Жарлыкка ылайык, маалыматтык коопсуздук талаптарын сактоо менен мамлекеттик органдардын калк менен өз ара аракеттенүүсүндө санариптик платформаларды жана интернет-сервистерди пайдалануу кеңейтилет.
Ошондой эле Башкы прокуратурага укук коргоо органдарынын ишмердүүлүгүнө байланыштуу жарандардын арыз-даттанууларына, анын ичинде ЖМКларда жана интернетте жарыяланган материалдарга туруктуу мониторинг жүргүзүү тапшырылды. Мыйзам бузуу фактылары аныкталса, күнөөлүү кызмат адамдарын жоопкерчиликке тартуу чаралары көрүлөт.
Жарлык расмий жарыяланган күндөн тартып жети күндөн кийин күчүнө кирет.
