Адылбек Касымалиев ИИМдин жаңыланган объектилери менен таанышты
Министрлер Кабинетинин төрагасы Адылбек Касымалиев Ички иштер министрлигинин бир катар объектилерине иш сапары менен барып, жүргүзүлгөн реконструкция жана техникалык жаңылоо иштеринин жыйынтыгы менен таанышты. Бул тууралуу Өкмөттүн Басма сөз кызматынан билдиришти.
Иш-чара Кыргыз Республикасынын эгемендүүлүгүнүн 35 жылдыгына карата уюштурулду.
Сапардын алкагында Министрлер Кабинетинин башчысы “Шумкар” атайын багыттагы полкунда болуп, жаңыланган инфраструктураны көрдү. Анда жаңы казарма курулуп, жабык мини-футбол аянтчасы, спорт залы жана кызматтык кабинеттер толугу менен реконструкцияланган.
Ошондой эле бөлүмдүн аймагында оңдоо-калыбына келтирүү иштери жүргүзүлгөнү маалымдалды.
Адылбек Касымалиев кызматкерлер үчүн түзүлгөн заманбап шарттар алардын физикалык жана кесиптик даярдыгын жогорулатууга өбөлгө түзөрүн белгиледи.
Мындан тышкары, ИИМдин Эксперттик-криминалисттик кызматынын жаңыланган лабораториясы көрсөтүлдү. Ички иштер министри Улан Ниязбековдун айтымында, лаборатория жогорку технологиялык жабдуулар менен камсыз болуп, молекулярдык-генетикалык изилдөөлөрдү так жүргүзүүгө мүмкүнчүлүк берет.
Кызматка ошондой эле кылмыштарды ачуу процессин ылдамдаткан “ПОИСК” автоматташтырылган баллистикалык системасы жана “Сонда” дактилоскопиялык системасы киргизилген.
Андан соң Министрлер кабинетинин төрагасы Бишкек шаарынын Свердлов райондук ички иштер башкармалыгынын капиталдык оңдоодон өткөн имаратын текшерди. Имаратта инженердик коммуникациялар толугу менен жаңыланып, жарыктандыруу жана электр камсыздоо системалары алмаштырылган.
Сапардын жыйынтыгында Адылбек Касымалиев укук коргоо органдарынын инфраструктурасын жакшыртуу милициянын ишинин натыйжалуулугун жогорулатууга жана жарандардын коопсуздугун камсыздоого өбөлгө түзөрүн белгиледи.
